شنبه ۱۸ آذر ۱۳۸۵ ه‍.ش. ياشاسين ميللي حوكومت! سعید متین پور بو گون 21 آذر دير.61 بير ايل دير باشلانيب!61 ايلليك بير گونون 61-نجي ايل دونومودور.بير باشا چاتماميش رومان كيمي ميليونلار آذربايجانلي نين گوزو اونونده آچيلميش بير گرچك.بو توكنمه ميش روماني يالنيز آذربايجان يوخ، بوتون ايران و دونيا توركلري ده اوخويابيلرلر.بير خالقين دوولتلشمه اورنگي دير.بوتون ايران و اورتادوغو ايچين ده بير دئموكرات دوولت اورنگي ساييلابيلر. توركلوگوموز بير گرچك ايسه، بير دونمده سوسياليست لريميزين ميللي حوكومت قورماغا چاليشمالاري دا بير گرچك دير."ميللي" دئديگيميزده بيريسي دئيه بيلر:بو گونكو ميلليت چي ليگيميز ايله فرقلي دير دئموكرات فيرقه سينين ميللي ليگي!اما بيريسي دئيه بيلمز آذربايجان ميللي حوكومتي ميلليت چي ليك ائتمه دي.بيرينجي كز اولاراق، ايراندا بير مدرن دوولت حوكومتي ساييلاراق، دئموكرات فيرقه سي تورك ديليني رسمي اعلان اتتدي.بو ايش بوتون اولكه ده ياشايان توركلرين گوزو اونونده ايدي و گوزو اونونده دير.فارس ديلي و اونون ميتولوژيك تاريخينين هژموني سيندن قورتولماغي بيرينجي كز آذربايجان دئموكرات فيرقه سي ايران آيدينينا آنلاتدي.بو رومان بيتمك زوروندادير.اوندان واز گئچمك، گئچميشده كي آيدينلاريميزين توركلوك دن واز گئچمه سينه بنزه يه بيلر. سيد جعفر پيشه وري نين سوندوغو آذربايجان موختاريتي، توركلر ايچين واز گئچيلمز بير تاريخي پروژه دير.اونو آنلامادان و بو وارليغي منيمسه مدن، ايرلي سورمك چوخ چتيندير.بيز وارليغيميزدان گئچمه گي چوخ راحتجاسينا باجاريريق؛ فارسچي آيدين(!؟) بابالاريميزدان قالان ياديگار كيمي!يوخسا ايدئولوژيك دونملر ارثيه سي اولان سياست اويونلاريني منيمسه مه گي تئز اورگنيريك؛ نه اولور بونلاردان واز گئچسك!دئموكرات فيرقه سيني اونوتماق يوخسا اونو بير باغيمسيز دوولت اورنگي كيمي اورتايا قويماق، بير تاريخي پروژه نين سيلينمه سي يوخسا مسخ ائتمه سي كيمي دير.فيرقه دن بيزه قالان و بو گون اونا باغلاناجاغيميز، آذربايجان توركچولوگودور.اونو گوتوره ليم. تاريخيميزدن، ايسته ديگيميز ايدئولوژيميز ايچين بير شئي لر سئچمك يوخسا بير شئي لري سيلمك يالنيز تاريخ و توپلوم ايله دوغال ايلگيميزي انگلله يه جك.تاريخيميزده بو گونكو دوشونجه ميزين ايزلري وار.اونلاري گوتوره ليم، توركلوگوموزون ائلئمانلارينين هئچ بيريسيندن واز گئچمه دن.واريميز يالنيز تاريخيميزدن و ياشاديغيميز بو گونكو توپلوموموزدان آلينير."ميللي حوكومت" او وارليقلاردان بيرسي دير؛ ياشاسين وارليغيميز! http://saidmatinpour.blogspot.ca/2006/12/blog-post_8585.html